Цагаан нуга

МОНГОЛ УЛСАД ХҮҮХДИЙН ЗУСЛАН БАЙГУУЛАГДСАНЫ 100 ЖИЛИЙН ОЙН БАЯРЫН МЭНДИЙГ “ОЙДОВ ХӨГЖИЛ” САНГИЙН ДЭРГЭДЭХ “ЦАГААН НУГА” ХҮҮХДИЙН ЗУСЛАНГААС ХҮРГЭЖ БАЙНА АА.

Хүүхэд багачуудын 2 дахь сургууль нь болсон хүүхдийн зуслан МУ-д үүсэж хөгжөөд өдгөө 100 дахь жилтэйгээ золгож байна. Хүний хөгжилд хүүхдийн зуслангийн үүрэг оролцоо ямар чухал ач холбогдолтойг та бүхэн бүгд мэдэх билээ.

ХХ зууны дунд үеэс МУ-д хүүхдийн зуслан ид цэцэглэн хөгжиж ОУ-ын болон орон нутгийн 360 гаруй зуслан ажиллаж байсан бол харамсалтай нь сүүлийн 30, 40  жилд 20 орчим болтлоо буурч уналтанд орсон байдаг. Харин өнгөрсөн 2025 онд ГБХНХЯ-ны мэдээнд 70 шахам зуслан бүртгэгдсэн байна. Эдгээр зуслангийн ихэнх нь өөрийн байргүй учир сургуулийн дотуур байр, гэр майханд цөөн хүүхдийн дунд зуслангийн хөтөлбөрийг хэрэгжүүлж эхэлж байгаа нь сайшаалтай байгаа ч хүүхдийн зуслан өмнөх шигээ хөгжихөд төр засгийн бодлого, эрх зүйн орчин, ард түмний амьжиргааны түвшин гэх мэт олон хүчин зүйл нөлөөлж байна аа.

                “Цагаан нуга” хүүхдийн зуслан ч мөн адил зах зээлийн шуурганд өртөж, 10 гаруй жил үйл ажиллагаа нь зогссон, тог цахилгаангүй байсныг “Ойдов хөгжил” сангийн ерөнхийлөгч, МУБИС-ийн профессор, ахмад багш З.Ойдов миний бие, гэргий ТЗИС-ийн ахмад багш, техникийн ухааны (Ph.D) доктор П.Баясгалан нар хариуцан ажиллуулж 20 дахь жилтэйгээ золгож байна.

Даяарчлалын шуурганд монголоороо үлдэх, эс үлдэх эгзэгтэй цаг үеийг ахмад багш бид илүү мэдэрч санаа зовж байдаг учир тус зуслан нь амрагч хүүхдүүдийн дунд “Тогтвортой хөгжил-бидний ирээдүй”, “Дэлхийн өв-Монгол соёл-Глобалчлал”, “Биеийн тамир-Спорт-Олимпизм”, “Эрхэмлэн дээдлэх үнэт зүйлстэй Монгол хүүхэд”, “Оюун ухаан”, “Түвшингийн зөрүү арилгах сургалт”, “Бясалгал, иога”  зэрэг хөтөлбөрийг голчлон хэрэгжүүлж байна.

Мөн сүүлийн жилүүдэд СУИС-ын багш нартай хамтран Нийслэл, дүүргүүдийн санхүүжилтээр УБ хотын есөн дүүргийн ЕБС-дад “Эрхэмлэн дээдлэх үнэт зүйлстэй монгол хүүхэд” хөтөлбөрийг хэрэгжүүлж байгаа билээ.

Хөтөлбөрийг хэрэгжүүлэх явцад судалгаа авч үр дүнг Их сургуулийн ЭШОП-ийн хурлаар хэлэлцүүлж ирсэн.

Монгол улсынхаа тусгаар тогтнол, дархан байдлыг бэхжүүлэхийн тулд төр, засгаас дэвшүүлж буй цэгцрэх бодлоготой санал нэг байна.

Цэгцрэхийн тулд хүүхэд багачуудаа бүх талын боловсролтой бодит чадвартай иргэн болгож төлөвшүүлэх хэрэгтэй. Иймд хүүхдийн зуслангийн  монгол өв соёл, арга ухаан шингэсэн хөгжлийн хөтөлбөрийг улам боловсронгуй болгож бүх зусланд болон бүх шатны сургалтын байгууллагад нэвтрүүлэх үйлсэд өөрсдийн зүгээс бие сэтгэлээ дайчлан хамтран ажиллахад бэлэн байна.

 Таныг хүндэтгэсэн: “Ойдов хөгжил” сангийн ерөнхийлөгч, МУ-ын хөдөлмөрийн баатар, зууны манлай тамирчин З.ОЙДОВ

“Цагаан нуга” хүүхдийн зуслангийн захирал, техникийн ухааны доктор П.Баясгалан